Bleif informeiert
Hei fëns du ëmmer di neisten Informatiounen wat eise Grupp plangt oder weieng Eventer virun der Dier stinn. Egal op d'Scouts-Rentrée, Adventsmaart oder Buergbrennen hei bleifs du um neiste Stand!
Adventsmaart 2022
Och dëst Joer war eisen traditionnellen Adventsmaart nees e grousse Succès. Mir soen Jiderengem MERCI den eis op dem flotten Dag besicht huet!
Adventsmaart 2021
Clotûre beim CIPA
Iwwert de Summer ware mir beim CIPA zu Nidderaanwen am Asaz. Mat ville Faarwen, Pinselen, Leederen an natierlech enger gudder Portioun Spaass hu mir d'Clotûre, di hannert dem CIPA steet verschéinert. Zil vum Projet ass et de Bewunner wärend dem Ausbau vum CIPA eng schéi Vue ze bidden. Elo kënne Si de Wee vun de Biber bis an d'Rover bewonneren. Mir hoffen, hinnen gefält eis Konschtwierk genau esou gutt wi eis!
Pakalu Take-Away
Mir soen jidderengem en groussen Merci deen eise "Pakalu Take-Away" ënnerstëtzt huet!
Mir hoffen natierlech, dass eisen Menü Iech geschmaacht huet an freeën eis schonn op dat nächst Event!
Fréijoersbotz 2021
Den 28ten Mäerz stoung bei eis an der Gemeng alles ënnert dem Motto "Fréijoersbotz". D'Aktioun ass vun der Emweltkomissioun Nidderaanwen organiséiert ginn. D'Bierger sinn opgeruff ginn an der ganzer Gemeng Dreck opzerafen an am speziellen "Drive-In" ofzeginn. Natierlech hunn eis Cheffen beim Tri eng Hand ugepaakt. Och eis Kanner hunn den Dag virdru fläisseg gehollef d'Natur propper ze halen. Well e Gudde Scoute verléisst eng Plaz méi propper wéi en se virfonnt huet.
"Adventsmaart" 2020
Eisen traditionellen Adventsmaart den dëst Joer ënnert enger anerer Form organiséiert gouf, ware groussen Erfolleg. E grousse Merci un all déi Leit, di eisen "Adventskranz Take-Away ënnerstëtzt hunn. Mir hoffen, dass a villen Haiser d'Käerzen un de Kränz fénkelen. Elo scho freeë mir eis op är Bestellungen vum nächste Joer. Mir wënschen Iech schéi Feierdeeg an eng gutt Gesondheet!
Adventskranz Take-Away 2020
Montée 2020
De Weekend vum 2ten an 3ten Oktober war bei eis am Grupp eng méi lass: D'Montée stoung um Programm. Ugefaangen huet et Freides Owes, wou eis Nowuess-Pio d'Gemeng onsécher gemaach hunn. De Samschdegmëtten stoung fir di Klengsten ganz am Zeechen vun de 4 Elementer. Op verschiddene flotte Statiounen hunn si di 4 Elementer agefaangen, fir als Belounung zum Schluss e Wëllefchersfoulard ze kréien. Owes war et dunn un den neien AvEx: Um Sennengerbierg am Bësch war eng Sportsolympiad, fir déi nach Sportler gesicht gi sinn. natierlech hunn eis Nowuess-AvEx sech bereet erkläert matzemaachen. Zum Schluss ass et kee Pokal ginn, ma en neien AvEx-Foulard!
Natierlech si bei all eisen Aktivitéiten di Sanitär- an Hygiènesreegelen agehale ginn.
Scouts-Rentrée 2020
Du wolls schonn ëmmer eng Kéier wësse wat d’Scoute sinn? Du hues Spaass u flotten an oofwiesslungsräichen Aktivitéiten an engem flotte Grupp? Da komm einfach bis laanscht!
